Spanja po përgatitet për një fluks të madh turistësh që do të udhëtojnë të mërkurën, më 12 gusht, për të parë eklipsin e plotë diellor. Sipas autoriteteve, rreth 460 mijë turistë ndërkombëtarë pritet të mbërrijnë në vend, ndërsa miliona udhëtime shtesë me automjete parashikohen brenda Spanjës drejt zonave nga ku eklipsi do të shihet më mirë.
Por fenomeni astronomik përkon me një situatë shumë të rrezikshme sa i përket zjarreve. Spanja ka kaluar një korrik rekord për temperaturat dhe thatësirën, ndërsa bimësia është jashtëzakonisht e thatë. Autoritetet paralajmërojnë se trafiku i shtuar dhe grumbullimi i njerëzve në zona rurale mund të komplikojnë ndërhyrjen e zjarrfikësve dhe të rrisin rrezikun e zjarreve të reja.
Për këtë arsye, janë vendosur masa të veçanta sigurie në disa rajone. Në Valencia, për shembull, janë mbyllur disa parqe natyrore dhe janë ndaluar zjarret, barbekjutë dhe fishekzjarrët, ndërsa autoritetet u kanë kërkuar vizitorëve të mos parkojnë pranë bimësisë së thatë dhe të mbajnë të lira rrugët e emergjencës.
Eklipsi do të përshkojë pjesën veriore të Spanjës nga brigjet e Atlantikut deri në Mesdhe dhe do të jetë i plotë edhe në Ishujt Balearikë. Fenomeni i rrallë pritet të sjellë përfitime të mëdha për turizmin, por autoritetet po përpiqen të shmangin që fluksi i jashtëzakonshëm i vizitorëve të kthehet në një problem sigurie.
