Kreu i PD-së Sali Berisha zhvilloi sot bashkëbisedon sot me qytetarët.
Berisha u shpreh se Shqipëria sot më e pasigurt se asnjëherë më parë. Hodhi akuza dhe për mediat, duke thënë se sillen sikur e ka fajin opozita.
“Disa media, në mënyrë të paturpshme sulmojnë opozitën ditë e natë. Sillen sikur e ka fajin opozita, por se në fakt fajin kryesor e ka qeveria. Kjo qeveri e mbytur nga korrupsioni. Shqipëria është një vend i pasigurt, policia është përlyer me krimin. Opozita sot është më e fortë se kurrë ”, tha Berisha.
Një qytetar protestues i tha se duket se protestat e PD-së nuk kanë dhe aq vlerë, pasi nuk po sjellin rezultat.
Përgjigjja e Berishës ishte kjo:
“Unë të falënderoj që ke marrë pjesë në protestë. Të ftoj që të qëndrojmë të pamposhtur. Është e vërtetë që shumë protestues kanë marrë plumba gome në kokë apo në këmbë. Por se po mbrohet një kauzë e drejtë e vendit. Kryengritja paqësore nuk e ka efektin menjëherë, por se kemi arritur shumë. Kemi mbrojtur nderin e shoqërisë shqiptare para mbarë botës, duke dhënë mesazhin se nuk pajtohemi me korrupsionin. E kemi damkosur këtë regjim. Do vazhdojmë kryengritjet paqësore deri në largimin e Ramës”.
U pyet se përse Partia Demokratike u bashkua me PS-në në lidhje me rezolutën për integrimin e vendit në Bashkimin Europian.
“Duhet të keni të qartë diçka. Shqipëria po hyn në Bashkimin Europian, vetëm për arsye gjeo-politike dhe asnjë tjetër. Përpos faktorit gjeo-politik, Shqipëria nuk plotëson asnjë kriter. Në rezolutë nuk ka asnjë vlerësim për punën e parlamentit apo të qeverisë. Zero. Ne nuk mund të votojmë kundër integrimit, pasi gjithë kombi shqiptar e dëshiron integrimin në BE. Por PD insiston që integrimi duhet të bazohet në meritë”, deklaroi Berisha.
Një qytetar e pyeti Berishën sesa metra ka kilometri i fundit, pasi nuk paska të sosur.
Përgjigjja e kryedemokratit ishte kjo:
“Faleminderit miku im për pyetjen. Rama ka dashur gjithmonë Shqipërinë pa opozitë ose që të ketë opozitë fasadë. Na morën vulën, na përjashtuan nga lista e votimit. Por sërish 500 mijë shqiptarë votuan për ne. Rama nisi më pas me arrestimet e politikanëve kryesorë të opozitës. Vuri në arrest dy liderët kryesorë të opozitës. Janë miratuar rezoluta ndërkombëtare kundër regjimit të Edi Ramës. Ne bëmë gjithë këto kilometra me sukses. Në secilin kilometër ne mund të ngecnim. Të mbrosh votën nuk është gjë e lehtë. Me librin e zi ne bëmë që procesi zgjedhor në Shqipëri të damkosej si farsë. Është kilometri i fundit, sepse nuk na thotë kush se jemi të izoluar ndërkombëtarisht, sepse kemi mbështetjen më të madhe. Tani hapi i radhës është qeveria teknike. Por zgjedhjet janë damkosur si të vjedhura. Me këtë regjim nuk ka zgjedhje. Kërkoj mirëkuptim, sepse nuk është kilometër i lehtë, por është vendimtar”.
