Në seancën e sotme plenare deputeti i Partisë Demokratike Gazment Bardhi ka kërkuar ndryshimin e rendit të ditës, për të futur si çështje diskutimi raportin e Parlamentit Europian për Shqipërinë.
Ai u ankua më pas se “na vjen një axhendë që nis me Taulant Ballën dhe mbyllet me 10 Taulant Balla të tjerë dhe në axhendë edhe pse, nuk ka asnjë përfaqësues të opozitës. Ky është bashkëpunimi që kërkoni ju me opozitën për procesin e integrimit europian?!”, tha Bardhi.
Kreu i grupit parlamentar të Partisë Socialiste Taulant Balla iu përgjigj se progres raporti u miratua nga Komisioni për Punët e Jashtme të PE-së dhe jo në Parlamentin e Europës ende. Prandaj nuk është nevoja të futet që sot në rend dite. E megjithatë ai shtoi se “javës tjetër” do të diskutohet kjo çështje.
“Kjo historia me marrë 2 minutëshin këtu me bo lajmin qe në e kërkuam, e para na bën qesharak sepse ne presim ta miratojë Parlamenti Europian”, tha Balla.
