Dy burra humbën jetën në një ngjarje tragjike në kryeqytet, pasi dyshohet se kanë rënë viktimë të një rrjedhje gazi në banesën e tyre. Sipas informacionit të fundit, viktimat janë 47-vjeçari Altin Maksuti, që jetonte në Greqi, dhe 56-vjeçari Vladimir Bengu.
Maksuti ishte kthyer në Shqipëri për të kryer disa punime në banesën e tij, dhe sipas hetimeve paraprake, ai dhe kushëriri i tij Bengu ishin në gjumë kur ka ndodhur rrjedhja e gazit nga ngrohësja. Kjo ka shkaktuar asfiksimin e të dyve, duke i marrë jetën.
Ngjarja u zbulua nga familjarët, të cilët pas disa orësh nuk kishin mundur të lidhen me ata dhe njoftuan Policinë. Forcat e rendit shpërthyen derën dhe gjetën trupat e pajetë të dy burrave. Grupi hetimor ka nisur hetimet për zbardhjen e plotë të shkaqeve të këtij aksidenti tragjik.
