Denzel Dumfries duket gjithnjë e më pranë Real Madrid. Mbrojtësi i Inter ka marrë një mesazh urimi nga ish-klubi i tij, VV Smitshoek, që e ka cilësuar si të kryer kalimin e tij në “Santiago Bernabéu”.
Pas fitores së Florentino Pérez në zgjedhjet presidenciale të Real Madrid, premtimet e tij të merkatos pritet të marrin formë. Fillimisht pritet prezantimi i José Mourinho si trajner, ndërsa në fushë emrat më të përfolur janë Konaté dhe Dumfries.
Sipas raportimeve, Konaté do të mbërrijë si lojtar i lirë, ndërsa për Dumfries Real Madrid duhet të paguajë klauzolën prej 20 milionë eurosh. Pikërisht ky transferim është bërë edhe më i besueshëm pas postimit të VV Smitshoek, klubi ku holandezi hodhi hapat e parë në futboll.
“Nga Smitshoek në Santiago Bernabéu. Sot, Denzel Dumfries firmos për Real Madrid. Një arritje e madhe në një karrierë mbresëlënëse”, shkroi ish-klubi i tij në rrjetet sociale.
Vetë Dumfries reagoi ndaj mesazhit duke falënderuar klubin: “Faleminderit shumë”.
30-vjeçari ka qenë një lojtar i rëndësishëm për Inter, skuadër me të cilën ka arritur dy finale të Champions League në katër vitet e fundit. Ai njihet për forcën fizike, daljet e shpeshta në sulm nga krahu i djathtë dhe kontributin në zonën kundërshtare.
Dumfries ka luajtur për pesë sezone me Inter pas eksperiencës te PSV, ndërsa është edhe titullar i rregullt me kombëtaren e Holandës. Me 1.88 metra gjatësi dhe prani të madhe fizike, ai përfaqëson një profil ndryshe nga Dani Carvajal dhe Trent Alexander-Arnold.
