Hetimet ndaj Ylli Zallës janë mbyllur 2 javë para arrestimit të tij nga policia dhe forcat RENEA.
Dosja në ngarkim të 49-vjeçarit ishte dorëzuar në Gjykatën e Tiranës, ndërsa ndaj tij rëndojnë akuzat për armëmbajtje pa leje dhe prodhim e shitje narkotikësh.
Për këto akuza, më 7 qershor gjykata kishte caktuar në mungesë masën e sigurisë “arrest me burg”.
Hetimet ndaj Zallës nisën pas vrasjes së Gilmando Danit. Në vijim të hetimeve, autoritetet kanë marrë në pyetje banorë të zonës ku ndodhi vrasja, si dhe persona që jetonin pranë vendit ku autorët dyshohet se braktisën dhe dogjën automjetin.
Zalla ishte thirrur nga autoritetet në cilësinë e personit që kishte dijeni për ngjarjen. Dy ditë pas vrasjes, policia shkoi në banesën e tij, ndërsa sipas prokurorisë, efektivët arritën të komunikonin me të në telefon.
“Do të paraqitem”, mësohet t’u ketë thënë Zalla efektivëve, por pas këtij komunikimi ai ndërpreu kontaktet dhe nuk u paraqit më.
Kontrollet në banesën e tij dhe në ambientet pranë shtëpisë së prindërve sollën sekuestrimin e armëve, celularëve, lëndëve narkotike, dylbive dhe pajisjeve të dyshuara si mjete shpërthyese të improvizuara. Në operacion u angazhuan edhe forcat RENEA.
Në një prej ambienteve është gjetur edhe një letër e shkruar me dorë, ku thuhej: “Duhet me ndërru telin, o Red, kujdes me telin”.
Ekspertizat e kryera gjatë hetimit kanë konstatuar se një prej pajisjeve ishte e aftë për shpërthim, ndërsa një pajisje tjetër e lidhur me telefon është vlerësuar si e paaftë për shpërthim, megjithëse tritoli dhe detonatori i saj rezultuan të aftë për shpërthim me vonesë.
Ndërkohë, gjatë kohës që ishte në arrati, Zalla kishte publikuar video-mesazhe në rrjetet sociale, ku kërkonte nga Policia e Shtetit zbardhjen e vrasjes së Gilmando Danit dhe deklaronte se ishte i pafajshëm, shkruan versus.
Arratia e 49-vjeçarit zgjati rreth 10 muaj. Ai u arrestua nga Policia e Shtetit dhe RENEA pranë zonës ku banonte, një ditë pasi në banesën e tij në Zallë të Fushë-Krujës ishte vendosur tritol.
Për shpërthimin, grupi hetimor ka ngritur dyshime se mund të ketë qenë i inskenuar nga vetë Zalla, me qëllim shmangien e përballjes me drejtësinë.
Pas arrestimit, Zalla është vënë në pranga dhe është marrë zyrtarisht i pandehur, ndërsa hetimet vijojnë për zbardhjen e plotë të rrethanave dhe lidhjeve të tij me ngjarjet nën hetim.
