Vetëm pak ditë para zgjedhjeve parlamentare të planifikuara për 28 dhjetor, dy kandidatë të Partisë për Liri, Drejtësi dhe Mbijetesë, Slagjan Nikolçeviq dhe Gordana Mihailoviq, kanë njoftuar tërheqjen e tyre nga gara zgjedhore.
Tërheqja vjen pas kritikave të ashpra që ata i kanë drejtuar kryetarit të partisë, Nenad Rashiq, për mënyrën se si, sipas tyre, po e menaxhon çështjen e përfaqësimit dhe pozitën e popullsisë serbe në Kosovë.
Të dy kandidatët tashmë kanë shprehur mbështetjen e tyre për presidentin e Serbisë, Aleksandar Vuçiq, dhe për Listën Serbe, e cila konsiderohet rivale direkte e partisë së Rashiqit.
Slagjan Nikolçeviq, përmes një postimi në Facebook, ka shprehur pakënaqësinë e tij ndaj udhëheqjes së partisë, duke theksuar mungesën e mbështetjes për serbët që, sipas tij, janë burgosur padrejtësisht. Ai ka vlerësuar politikën e Aleksandar Vuçiqit si “shpresë” për serbët që jetojnë në Kosovë.
Ndërkohë, presidenti serb Vuçiq ka bërë thirrje të hapur për votimin e Listës Serbe, duke theksuar rëndësinë e përfaqësimit të serbëve në Kuvendin e Kosovës.
Në këtë kontekst, Presidenca e Serbisë është akuzuar për ndërhyrje në procesin zgjedhor, pasi ka premtuar hapjen e vendeve të reja të punës në sistemin paralel shëndetësor.
Ky veprim ka nxitur kritika dhe akuza për ndikim të jashtëm në zgjedhjet kosovare. Autoritetet serbe janë kritikuar edhe më herët për përfshirje aktive në zgjedhje, shpesh me qëllim rritjen e mbështetjes për Listën Serbe, e cila në zgjedhjet e fundit fitoi 10 ulëse në Kuvend.
Edhe Gordana Mihailoviq ka deklaruar se politika e Vuçiqit është thelbësore për mbijetesën e serbëve në Kosovë. Nga ana tjetër, Partia për Liri, Drejtësi dhe Mbijetesë ka reaguar duke thënë se i kishte pritur këto tërheqje dhe se ato nuk do të ndikojnë negativisht në funksionimin dhe rezultatin e saj zgjedhor.
