Transferimi i Donyell Malen, sulmues holandez i lindur në vitin 1999, në Premier League është drejt përfundimit. Malen po largohet njëherë e përgjithmonë nga Borussia Dortmund për të nisur një kapitull të ri në jetën dhe karrierën e tij. Pas disa vështirësive për të shfaqur plotësisht potencialin e tij nën drejtimin e Nuri Sahin, lojtari ka vendosur të pranojë një kontratë afatgjatë me një klub tjetër.
Siç ka zbuluar ‘Sky Sports DE’, Borussia e Dortmundit dhe Aston Villa kanë arritur një marrëveshje totale për transferimin e Malen te skuadra e drejtuar nga Unai Emery.
Sulmuesi 25-vjeçar (do të bëhet 26 më 19 janar) do të veshë fanellën e ‘Villains’ për një marrëveshje prej 25 milionë eurosh, plus 5 milionë euro bonuse dhe 3 milionë euro të garantuara. Tani mbeten vetëm disa detaje të vogla për t’u përfunduar për të zyrtarizuar marrëveshjen, por është çështje kohe.
Malen nuk do të udhëtojë sot me Borussia Dortmundin për në Kiel, një tjetër tregues i qartë se transferimi i tij në “Villa Park” është i pashmangshëm.
Marrëveshja midis BVB dhe Aston Villa-s ka tejkaluar ofertat fillestare të klubit anglez, të cilat varionin midis 16 dhe 18 milionë eurove. Në fund, verdhezinjtë do të përfitojnë një shifër totale prej 33 milionë eurosh.
