Klodian Braho, ka shpalosur vizionin e tij para anëtarëve të Këshillit të Lartë të Prokurorisë, për kandidaturën që ka shpallur për të qenë kreu i ri i SPAK.
Në fjalën e tij, Braho teksa ka bërë një përmbledhje të eksperiencës së tij të gjatë në sistemin e drejtësisë, ai evidentoi edhe punën që ka bërë si prokuror i SPAK.
Fokusi i tij ka qenë në hetimin e pasurisë të zyrtarëve të lartë dhe grupeve kriminale si dhe sekuestrimi i tyre. Ky vizion, tha Braho, do të jetë edhe nëse ai zgjidhet në krye të SPAK.
Më tej, ai shtoi se do të mbështesë prokurorët, për të ushtruar punën e tyre, të pa ndikuar nga faktorë të brendshëm ose të jashtëm.
“Unë kam një eksperiencë prej 18 vite në sistemin e prokurorisë. Kam mbaruar me nivelin e shkëlqyer Shkollën e Magjistratutës dhe kam ushtruar detyrën në disa prokurori të vendit. Në prokurorinë e Vlorës kam qenë pjesë e taks forcës. Në Krimet e Rënda kam qenë pjesë e njësisë për hetimin e korrupsionit dhe pasurisë, hetimin e zyrtarëve të lartë. Në këtë prokurori në 2019 deri sa pushoi së ekzistuari kam ushtruar edhe detyrën e drejtuesit të sesionit.
Gjatë përvojës time kam përfaqësuar akuzën për disa çështje penale, ku përfshihen funksionarë publikë në çdo nivel.
Në çështjet penale, në mënyrë sistematika kam kërkuar edhe sekuestrim pasurie, që shkon në miliona euro. Në 2023 u sekuestrua 18.4 milionë euro, që i përkisnin një organizate kriminale. Kjo shumë është sa dyfishi i buxhetit të SPAK.
Ky kandidim është një angazhim për të sulmuar korrupsionin dhe krimin e organizuar. Vizioni im është ndërtimi i një strukture model dhe duke fituar respektin dhe besimin e qytetarëve.
Do marr të gjitha masat për të vënë në zbatim çdo gjë. do garantoj zbatimin e barazisë para ligjit.
Do të kryej veprimet e nevojshme për prokurorin e posaçëm që të ushtrojë detyrën. Do mbështes çdo prokuror të pa ndikuar nga faktorë të jashtëm ose të brendshëm
Çdo çështje penale të shoqërohet me hetim pasuror dhe të sekuestrohen pasuritë e paligjshme”, tha Braho.
