Gazetari Enkel Demi ka reaguar në lidhje me incidentin e ndodhur gjatë transmetimit “Live” të emisionit “Top Story” ku moderatorja Grida Duma pas një debati të ashpër nxorri jashtë analistin Alfred Lela.
Për situatën në fjalë, gazetari Demi shkruan se kohë më parë, të ftuarin e thërrisnin për ta dëgjuar, dhe jo që i ftuari të dëgjonte gazetarët. Ai shton se nuk mendohej që i ftuari të përjashtohej nga emisioni.
“Dikur…, pothuaj në lashtësi, kur bënim ende gazetarin, të ftuarin e thërrisnim në studio ta dëgjonim, jo të na dëgjonte…lëre pastaj ta nxirrnim përjashtë…,
…por kjo ka qenë dikur, shumë dikur…, pothuaj në kohën e Baba Qemos,” shkruan Demi.
Mbrëmjen e djeshme analisti dhe Drejtori i Komunikimit në PD, Alfred Lela u përzu nga studio e emisionit “Top Story”, pas një debati të ashpër me moderatoren dhe ish-deputeten demokrate Grida Duma, shkak i të cilës u bë ngjarja tragjike te “Farmacia 10” ku u dogjën disa apartamente.
Duma pyeti Lelën se përse deputetët e Partisë Demokratike nuk dolën në krah të banorëve. Por papritmas situata u agravua më tej derisa analisti i tha moderatores të mos i drejtonte gishtin, ose në të kundërt “duhet t’i gjente vend ku ta fuste”.
Pasi u ngritën tones mes tyre, Alfred Lela u largua nga studio, pasi Grida Duma i tha se e përzinte sa herë të donte nëse ai vazhdonte të shkelte etikën.
