Policia e Sarandës ka identifikuar tre autorët e dyshuar të sulmit ndaj oficerit të Policisë, Mihal Velço, ngjarje e ndodhur mbrëmjen e së enjtes në qytetin bregdetar. Të tre personat janë shpallur në kërkim, ndërsa rezultojnë me precedentë të mëparshëm penalë.
Sipas burimeve policore, autorët e dyshuar janë Andrea Rubati, 27 vjeç, Antonio Lefteri, 30 vjeç dhe Engjëll Dalanaj, 30 vjeç.
Ngjarja ka ndodhur rreth orës 23:00, në lagjen nr. 4. Mihal Velço, Oficer Policie në Komisariatin e Policisë Sarandë, ka njoftuar sallën operative se tre persona që lëviznin me motomjete e kanë goditur dhe më pas e kanë kanosur me thikë. Sipas kallëzimit, konflikti nisi pasi oficeri u kërkoi të mos kryenin manovra të rrezikshme me motomjetet në qytet.
Pas ngjarjes, tre të dyshuarit u larguan me shpejtësi nga vendi i ngjarjes. Policia, nëpërmjet informacioneve të siguruara dhe analizimit të pamjeve filmike, arriti të identifikojë autorët e dyshuar.
Gjatë natës dhe në vijim të operacionit, shërbimet e policisë ushtruan kontrolle në disa banesa ku dyshohej se mund të fshiheshin personat në kërkim.
U kontrollua banesa e Andrea Rubatit në rrugën “Mitat Hoxha” në Sarandë, si edhe banesa e gjyshit të tij në fshatin Livadhja, Bashkia Finiq, por ai nuk u gjet. Po ashtu u kontrollua banesa e Antonio Lefterit në rrugën “Skënderbej”, ku ndodheshin prindërit e tij, ndërsa gjatë ditës së sotme u kontrollua edhe banesa e Engjëll Dalanajt në rrugën “Onhezmi”, pa rezultat.
Tre të dyshuarit janë shpallur në kërkim dhe hetohen për veprat penale “Goditja për shkak të detyrës” dhe “Kanosja”, të parashikuara nga nenet 237 dhe 84 të Kodit Penal. Policia vijon operacionin për lokalizimin dhe arrestimin e tyre.
