Është arrestuar njëri prej dhunuesve të gazetarit Ilir Demalia, i cili u sulmua ditën e djeshme sapo kishte dalë nga banesa.
Në pranga ka rënë Roland Sula, ndërkohë që një tjetër person që ka marrë pjesë në dhunën e ushtruar ndaj gazetarit, është shpallur në kërkim.
Vetë Demalia pretendonte në dëshminë e tij në Polici se sulmi nuk kishte të bënte me motive politike.
Sipas gazetarit Demalia, autori i sulmit ishte një banor i zonës, që e kishte akuzuar se kishte lajmëruar policinë për të shkuar për të gjobitur makinat e parkuara keq në rrugë.
“Sot, më datë 01.07.2026, rreth orës 12:00, në rrugën “Çamëria”, dyshohet se, për motive të dobëta, është goditur me grusht gazetari, shtetasi I. D., i cili është transportuar në spital për të marrë ndihmë mjekësore. Menjëherë pas marrjes së njoftimit, shërbimet e Policisë kanë shkuar në vendngjarje dhe, falë veprimeve të shpejta hetimore, është bërë i mundur identifikimi i autorit të dyshuar të ngjarjes, shtetasit R. S., i cili është shpallur në kërkim. Vijon puna intensive për lokalizimin dhe kapjen e tij. Në vijim të veprimeve procedurale, është bërë bllokimi dhe sekuestrimi i automjetit të përdorur nga autori i dyshuar”, shkruhej në njoftimin e Policisë.
