Komisioni Qëndror i Zgjedhjeve ka reaguar në lidhje me pezullimin e dërgesave nga kompania DHL Express për në SHBA. Kjo kompani ka marrë përsipër dhe dërgimin e kutive me fletët e votimit për diasporën shqiptare kudo në botë, përfshi dhe në SHBA. KQZ sqaron se vendimi i kësaj kompanie, nuk ka ndikim te zarfet me fletët e votimit, për shkak se këto nuk kanë vlerë doganore.
Sqarimi i KQZ-së: Në përgjigje të kërkesës për informacion që ka ardhur, ju bëjmë me dije se dërgesat me përmbajtje fletëvotimi janë dokumente dhe nuk kanë vlerë doganore. Çdo masë e përkohshme që mund të merret lidhur me ndryshimin e tarifave dhe ndryshimin e veprimeve doganore për mallrat me vlerë të lartë nuk ka lidhje me dokumentet. Në këtë kuptim, shqetësimi i ngritur nga ana juaj nuk ka ndikim apo lidhje me dërgesat e dokumentacionit zgjedhor që janë nisur nga KQZ drejt zgjedhësve.
