Autoritetet maqedonase kanë nisur hetime të thelluara për të zbardhur shkaqet dhe përgjegjësitë e tragjedisë që ndodhi më 16 mars 2025 në diskotekën “Pulse” në Koçan.
Prokuroria ka arrestuar 15 persona, duke përfshirë pronarin e diskotekës, Dejan Jovanov – Deko, si dhe disa zyrtarë të dyshuar për korrupsion dhe shkelje të rregullave të sigurisë.
Një nga pistat kryesore të hetimit lidhet me dyshimet se Jovanov mbante një bllok me emrat e personave të cilëve u kishte dhënë ryshfet për të mbajtur biznesin e tij në funksion, pavarësisht shkeljeve të mundshme ligjore.
Pamjet e sigurisë dhe dëshmitë e mbledhura deri tani tregojnë se në momentet e para të zjarrit, pronari i diskotekës u përpoq ta shuante me një fikës zjarri, por ai rezultoi i papërshtatshëm për përmasat e flakëve. Prokuroria ende nuk ka konfirmuar nëse brenda diskotekës kishte kamera sigurie funksionale, por po shqyrton pamjet e mundshme nga një objekt pranë lokalit.
Zjarri shpërtheu gjatë një koncerti të grupit vendas DNK, ku ishin të pranishëm rreth 1,500 të rinj. Dyshohet se shkaku i zjarrit ishte përdorimi i fishekzjarreve brenda ambienteve të lokalit gjatë festës. Tragjedia mori 59 jetë dhe la mbi 150 të plagosur, duke tronditur opinionin publik.
Pas kësaj ngjarjeje të rëndë, qeveria e Maqedonisë së Veriut ka urdhëruar inspektime të rrepta në të gjitha klubet e natës për të parandaluar incidente të ngjashme në të ardhmen.
