Ousmane Dembélé ishte sërish protagonist në Champions League, duke zhvilluar një tjetër paraqitje të madhe ndaj Bayern Munich në “Parc des Princes”.
Ndeshja kishte ritmin dhe emocionet e një finaleje, ndërsa PSG triumfoi 5-4 në një spektakël të jashtëzakonshëm. Edhe pse humbi një rast të pastër përballë Neuer, sulmuesi francez reagoi fuqishëm dhe shënoi dy gola shumë të rëndësishëm për ta mbajtur të hapur garën për finalen.
Pas ndeshjes, Dembélé foli për “CBS Sports Golazo” dhe zbuloi një nga arsyet kryesore të suksesit të PSG nën drejtimin e Luis Enrique.
“Është e thjeshtë. Nëse nuk bën presing, nëse nuk mbron, Luis Enrique të ul në stol”, u shpreh Dembélé.
Sulmuesi francez vlerësoi edhe spektaklin që dhuruan të dyja skuadrat në fushë.
“Të dyja ekipet sulmonin, sulmuesit, mesfushorët dhe mbrojtësit e krahut. Të gjithë sulmonin. Është një spektakël i mrekullueshëm për tifozët, por kërkon shumë energji nga ne. Ishte një ndeshje e jashtëzakonshme dhe presim të njëjtën gjë në Munich”, shtoi ai.
Duke folur më pas për mediat zyrtare të PSG, Dembélé pranoi se skuadra u relaksua pak pas avantazhit 5-2.
“Jemi të lumtur me rezultatin, por në 5-2 u lëshuam pak në fund. Ishte një ndeshje e pabesueshme”, tha francezi.
Me sytë nga ndeshja e kthimit në “Allianz Arena”, Dembélé theksoi se PSG nuk do të ndryshojë filozofi.
“Tani duhet të shkojmë në Munich dhe të fitojmë për t’u kualifikuar. Duhet të jemi shumë të përqendruar. Nuk do ta ndryshojmë filozofinë tonë: ne do të sulmojmë dhe ata do të na sulmojnë. Mendoj se edhe ndeshja e kthimit do të jetë e madhe”, përfundoi ai.
Këtë sezon, ish-lojtari i Barcelona dhe Dortmund ka shënuar 18 gola dhe ka dhënë 10 asistime në 35 ndeshje zyrtare. Edhe pse nuk ka arritur shifrat e sezonit të kaluar, ai mbetet një nga lojtarët më në formë në futbollin evropian.
Ndeshja e kthimit mes PSG të Luis Enrique dhe Bayern Munich të Vincent Kompany do të luhet të mërkurën, më 6 maj, në orën 21:00.
