Samiti i Diasporës i zhvilluar këtë paradite në Tiranë, është shoqëruar edhe me tensione e përplasje, kjo sepse përgjatë diskutimeve ka pasur kritika nga ana e përfaqsuesve të diasporës. Një juriste shqiptare, Eva Baçi, e cila jeton dhe punon në Bolonja të Italisë që prej kohës kur ka qenë studente, është shprehur se varësisht dëshirës së madhe për tu rikthyer në Shqipëri mungon hapësira reale për t’u përfshirë.
Gjatë zhvillimit të panelit në të cilin ishin të pranishëm Niko Peleshi dhe Taulant Balla ajo u shpreh se organizime të tilla nuk paraqesin zërin e vërtetë të diasporës. Duke kritikuar faktin se pjesëmarrësit nga diaspora nuk marrin fjalën aq sa duhet varësisht faktit se “janë aktorët kryesorë” të këtij samiti.
“Dëshira për t’u kthyer në Shqipëri është shumë e madhe, ndaj marrim pjesë në Samite sepse presim një dritare te hapur nga toka mëmë, për t’u kthyer, që të na hapë derën. Skenari është shkruar shumë bukur, si ai regjisori që shkruan shumë bukur, dëgjojmë narativa, por mungojnë aktorët kryesorë që është Diaspora. Ky është Samiti i Diasporës. Mendoj se përveç hapjes që fjala duhet t’u jepet ministrit, kryeministrit dhe presidentit, aktorët kryesorë jemi ne. Unë doja që të bëja një diskutim dhe nuk m’u dha e drejta e fjalës. Duhet t’i mbarojmë këto filmat e bukur, që ne vetëm të dëgjojmë”, tha Eva Baçi
Më tej juristja ngriti shqetësimin se pavarësisht përgatitjes së lartë profesionale, mbështetja dhe përkrahja e dhënë nga institucionet shqiptare është shumë e ulët: “Unë kam mbaruar 3 fakultete në Bolonjë, kam dy specializime. Kemi kërkuar shumë herë, që të hyjmë të japim kontributin tonë. Unë punoj 14 orë në Itali, por mund të punoj 20 orë për Shqipërinë. Unë nuk kam vend ku të flas, dua të shpreh atë që kam, sepse përndryshe ne ngelemi vetëm numra. Unë nuk mund të pres biletën të vij që andej për të qenë një numër. Unë kam ngelur shumë keq dje, kur u dhanë çmimet. Në krahun tim është njëri nga sipërmarresit shqiptarët që i jep punë 350 familje dhe ju nuk i dhatë një çmim, Astrit Poti”
Eva Baçi më pas është shprehur se sipas saj “politikanët janë jashtë realitetit”, dhe kërkoi që të hapen dyer. Duke bërë në fund edhe një thirrje ndaj Taulant Ballës të cilit iu drejtua: “Kam edhe shumë gjera, por po të më jepet mundësia unë diskutimin e kisha përgatitur. Zoti Taulant Balla, je i pari që je shumë larg realitetit. Votën mund ta kalosh edhe 4 vite të tjera, por në histori duhet të lesh një emër”
“Ju jeni larg realitetit, flas për politikanët, jeni larg realitetit, nuk jeni afër me ne. Jemi pa përkrahje dhe kur nuk të përkrah shteti yt, kur ti nuk jep kontribut në shtetin tënd. Unë për Italinë jam më e përgatitura, por jam thjesht e huaj. Ne duam të kthehemi në vendin tonë.
Këto panelet e ndara nuk janë mirë. Ne aktorët kryesore duhet të flasim, të sjellim problemet. Jo të dëgjojmë politikanët, narativa është shumë e bukur, por ju nuk e keni idenë cfarë do të thotë sakrifica, pa asnjë përkrahje dhe asnjë ndihmë.
Hapni dyer, sepse Shqipërisë nuk i mungon truri. I keni mbyllur dyert, të gjitha personave që janë të përgatitur”, është shprehur ajo.
