Luis de la Fuente ka mbetur shumë i kënaqur me paraqitjen e Spanjës në fitoren bindëse ndaj Austrisë, që i dha “La Roja”-s kualifikimin mes 16 më të mirave të Botërorit.
Pas ndeshjes, trajneri spanjoll vlerësoi reagimin e skuadrës dhe theksoi se ekipi ishte shumë pranë një paraqitjeje perfekte.
“Skuadrat e mëdha shfaqen kur duhet. Ishim shumë të vetëdijshëm për atë që kishte ndodhur në ndeshjet e mëparshme. Iu afruam perfeksionit pothuajse në çdo aspekt. Duhet të vazhdojmë të përmirësohemi”, tha De la Fuente.
Trajneri shtoi se Spanja nuk duhet të kënaqet, pasi në fazën tjetër kundërshtarët do të jenë edhe më të fortë.
“Gjithçka mund të përmirësohet edhe pak më shumë. Në fazën e 16 më të mirave, kundërshtarët janë edhe më të vështirë. Mentaliteti ynë është të përmirësohemi. Kjo skuadër kërkon gjithmonë më shumë”, u shpreh ai.
De la Fuente foli edhe për Mikel Oyarzabal, autorin e dy golave ndaj Austrisë, duke e vlerësuar maksimalisht sulmuesin.
“Ai tregoi edhe një herë potencialin e tij. Meriton vlerësim. Por edhe pjesa tjetër e skuadrës zhvilloi një ndeshje të jashtëzakonshme”, deklaroi trajneri.
I pyetur për një përballje të mundshme me Kroacinë ose Portugalinë, De la Fuente u tregua i kujdesshëm.
“I njohim shumë mirë dhe kushdo që të vijë deri aty, do ta ketë merituar”, përfundoi ai.
