Deputeti i PD-së, Dashnor Sula, dje njoftoi se nuk do të jetë më pjesë e listës së kandidatëve për deputet, duke shtuar se e kanë lënë jashtë me arsyen se mbështet strukturën e posaçme të drejtësisë dhe është përfshirë në SPAK. Ky vendim ka ngjallur shumë reagime dhe kontradikta, duke krijuar një dilemë mbi realitetin e tij dhe mundësinë e një rikthimi të mundshëm.
Në fjalën e tij në Kuvend, Sula e konsideroi Edi Ramën dhe Sali Berishën si “tumorin” që mban peng politikën shqiptare, duke i akuzuar për marrëveshje të errëta dhe interesash personale që kanë penguar zhvillimin e vendit për më shumë se tre dekada. Ai e cilësoi marrëveshjen e 21 prillit të vitit 2008 si një moment kritik, duke theksuar se ai e ka kundërshtuar atë marrëveshje që, sipas tij, u bë pas tragjedisë së Gërdecit, ku humbën jetën 26 persona.
“Të shohësh këtë sallë bosh, një qeveri që mungon. Vetëm më 2 anëtar kabineti këtu mbrapa, është e trishtushme. Ka një të keqe, një burim, një tumor që e mban peng politikën shqiptare. Ky tumor është Edi Rama dhe Sali Berisha. Dy burra që kanë bërë përgjatë këtyre 34 viteve për interesa personale, totalisht personale marrëveshje të errëta.
Nuk e them sot që ika nga PD. E kam denoncuar këtë marrëveshje edhe më parë. Kur refuzonim ne seancat plenare, kam qenë totalisht kundër një marrëveshje të PD me PS.
E keqja e kësaj politike ka nisur me 21 prill të vitit 2008. Jam krenar për veten time kundra. Pakt i errët, Berisha-Rama me 21 prill 2008, kur pa iu tharë flokët viktimave të Gërdecit, 26 viktimave, u bë një marrëveshje e turpshme. Unë e kam votuar kundër.
Në 2009 ikën të gjithë ata që ishin kundër në PD, dhe kam shpëtuar vetëm unë. Këtij parlamenti i duhen burra dhe gra të ndershëm.“, tha Sula.
