Milan përballet nesër mbrëma me Bolognën në një sfidë kyçe për garën drejt kupave europiane, dhe trajneri Sergio Conceiçao ka vendosur të mos bëjë rotacione masive. Portugezi kërkon maksimumin e përqendrimit dhe 9 pikët e plota në tre ndeshjet e fundit të kampionatit për të tentuar ngjitjen në renditje deri në fund. Edhe pse finalja e Kupës së Italisë është në horizont, ai nuk do të kursejë shumicën e titullarëve.
Dilema në sulm: Joao Felix zëvendëson Leaon
Leao është i pezulluar dhe në vend të tij do të luajë Joao Felix, që shkëlqeu ndaj Genoas duke kontribuar në të dy golat. Pulisic do të nisë titullar në krahun tjetër, duke lënë në stol Chukwueze. Në majë të sulmit vazhdon dueli mes Gimenez dhe Jovic, me meksikanin disi më të avantazhuar. Abraham, sapo i rikthyer, mund të aktivizohet gjatë lojës.
Mesfushë fizike dhe mbrojtje e konfirmuar
Në mungesë të Fofana, që ende nuk është në formën optimale, do të luajë Loftus-Cheek – i vlerësuar nga Conceiçao për fizikunin dhe lidershipin. Përkrah tij do të jetë Reijnders, ndërsa Musah do të nisë nga stoli. Në krahët e mesfushës janë testuar sërish Theo Hernandez dhe Alex Jimenez. Walker dhe Terracciano do të mungojnë – i pari ende në probleme pas një dëmtimi serioz në bërryl.
Në mbrojtje nuk priten ndryshime të mëdha: Maignan në portë, me Tomori, Gabbia dhe Pavlovic përpara tij. Megjithatë, nuk përjashtohet aktivizimi i Thiaw në vend të Gabbias, si pjesë e rotacioneve normale.
Bologna është paralajmëruar: Conceiçao do të luftojë deri në fund, pa eksperimente.
