Ndeshja mes Union Berlin dhe Stuttgart, e vlefshme për javën e 30-të në Bundesligë, ka qenë një spektakël më vete. Rezultati përfundimtar 4-4 dhe të tetë golat janë shënuar brenda pjesës së parë.
Vendasit shënuan dy herë të parët me Ilic 5′ dhe Leite 19′, më pas ishte radha e miqve për të shënuar dy herë duke barazuar shifrat me Undav dhe Millot në minutat 23′ dhe 29′.
Union Berlin shënoi golin e tretë në minutën e 38′ me Querfeld, fundi i pjesës së parë ishte i “zjarrtë” për të dy ekipet. Fillimisht Stuttgart shënoi dy gola për 2 minuta me Chabot në 43′ që barazoi shifrat 3-3 dhe me Fuhrich që shënoi golin e katrët, por të zotët e shtëpisë nuk u dorëzuan dhe gjetën golin e barazimit në minutën e fundit shtesë me Ilic, goli i dytë për të në këtë takim. Në pjesën e dytë nuk u shënua asnjë gol.
Pas këtij barazimi, Union Berlin renditet në vendin e 13-të, ndërsa Stuttgart në vendin e 11-të.
