Manchester City ka reaguar fort pas deklaratave të Enrique Riquelme, kandidatit për president të Real Madrid, i cili premtoi transferimin e Erling Haaland nëse fiton zgjedhjet.
Klubi anglez e ka bërë të qartë se sulmuesi norvegjez është pjesë e planeve të tij dhe se nuk ekziston asnjë mundësi për largimin e tij në këto kushte.
Në një reagim të dërguar për AS, City i cilësoi si të pavërteta raportimet nga Spanja për të ardhmen e Haaland dhe paralajmëroi se po shqyrton edhe veprime ligjore për përdorimin e imazhit të lojtarit.
“Lajmet që kanë dalë nga Spanja për të ardhmen e Erling Haaland janë të pavërteta. Nuk ka asnjë mundësi që kjo të ndodhë dhe nuk ekziston asnjë klauzolë që e lejon. Po shqyrtojmë veprime ligjore për përdorimin e imazhit të lojtarit tonë në këtë kontekst”, thuhet në reagimin e klubit.
Situata u bë më e tensionuar pasi Riquelme u shfaq me një fanellë të Real Madrid me emrin e Haaland dhe numrin 9, duke detyruar drejtuesit e City të reagojnë menjëherë.
Sipas AS, drejtori sportiv Hugo Viana ka kontaktuar përfaqësuesit e Haaland pas këtij episodi, për të sqaruar situatën dhe për të koordinuar qëndrimin publik.
Pavarësisht zërave dhe premtimeve të Riquelme, Manchester City mbetet i vendosur të ndërtojë skuadrën rreth Haaland për sezonin e ardhshëm.
