Gara për titullin në Premier League është bërë edhe më e fortë. Manchester City ka ngushtuar diferencën me Arsenal në vetëm dy pikë, duke i vendosur londinezët nën presion të madh në javët e fundit të sezonit.
Skuadra e Mikel Arteta kryeson kampionatin me 76 pikë, ndërsa Manchester City ndjek me 74 pikë. Guardiola dhe të tijtë nuk kanë ndërmend të dorëzohen, sidomos duke parë kalendarin e mbetur, ku City do të luajë dy nga tre ndeshjet e fundit në shtëpi, ndërsa Arsenal vetëm një.
Arsenal do të përballet fillimisht me West Ham në transfertë, më pas pret Burnley në shtëpi dhe e mbyll kampionatin ndaj Crystal Palace në transfertë. Nga ana tjetër, Manchester City ka ende për të luajtur ndaj Crystal Palace në shtëpi, Bournemouth në transfertë dhe Aston Villa në “Etihad”.
Përveç garës në kampionat, të dyja skuadrat kanë edhe angazhime të tjera të rëndësishme. Arsenal do të ketë në mendje finalen e Champions League ndaj PSG, edhe pse ajo do të luhet pas përfundimit të Premier League. Ndërkohë, Manchester City ka përpara edhe finalen e FA Cup ndaj Chelsea, që mund të ndikojë në energjitë e skuadrës në këtë fund sezoni.
Një skenar i mundshëm është që Arsenal dhe City ta mbyllin kampionatin me pikë të barabarta. Në këtë rast, vendimtare do të jetë diferenca e golave. Aktualisht, Arsenal ka golavarazh +41, ndërsa Manchester City +40, pra diferenca është shumë e ngushtë.
Nëse edhe golavarazhi do të jetë i barabartë, atëherë do të shikohen golat e shënuar. Në këtë statistikë, City ka avantazh me 72 gola, kundrejt 67 të Arsenal. Nëse edhe kjo nuk do të mjaftonte, titulli do të vendosej nga përballjet direkte, ku City do të kishte përparësi pas fitores 2-1 në ndeshjen e fundit dhe barazimit 1-1 në takimin e parë.
Me vetëm pak ndeshje të mbetura, gara për titull në Angli është më e hapur se kurrë. Arsenal kryeson, por nuk ka më luksin të gabojë, ndërsa Manchester City vazhdon të besojë te përmbysja deri në javën e fundit.
