Policia ka reaguar zyrtarisht lidhur me një lajm që qarkulloi në media pasditen e kësaj të premte, nëpërmjet të cilit njoftoheshin prindërit të bënin kujdes me fëmijët në shkolla për shkak të një ‘droge çamçakëz’ që ishte konstatuar në një shkollë në kryeqytet.
Sipas denoncimeve që u bënë nga persona të ndryshëm në rrjetet sociale, fëmijët që e përdorin këtë substancë të çuditshme shfaqin shenja lodhje dhe gjumi.
Policia ka njoftuar se është në kontakt me drejtuesit dhe mësuesit e shkollave, për të verifikuar rastin në fjalë.
Njoftimi i Policisë:
Në lidhje me një lajm të publikuar ditën e sotme, në disa media dhe portale, në të cilin thuhet se në një shkollë në Tiranë, është evidentuar rasti i përdorimit të një çamçakëzi që përgjum fëmijët, ju informojmë se:
Shërbimet e Policisë menjëherë pas publikimit kanë marrë kontakte me drejtuesit dhe stafet pedagogjike të të gjitha shkollave të Tiranës, dhe po ushtrojnë kontrolle për verifikimin e rastit në fjalë.
Drejtoria Vendore e Policisë Tiranë i bën thirrje të gjithë qytetarëve të njoftojnë menjëherë Policinë në rast konstatimi të këtyre substancave.
Vijon puna për sqarimin e rrethanave të këtij rasti të publikuar.
