Inspektoriati Kombëtar i Mbrojtjes së Territorit ka zbarkuar së fundmi në qytetin e Sarandës, ku ka ndërhyrë ndaj një objekti që po ndërtohej në kundërshtim të plotë me ligjin.
Bëhet fjalë për një strukturë të ngritur në zonën e plazhit, në lagjen nr. 1 të qytetit bregdetar, ku një pjesë e ndërtimeve dyshohet se ishin vendosur edhe mbi ujë. Pas konstatimit të shkeljeve, autoritetet kanë vendosur menjëherë shiritin bllokues, ndërsa operacioni ka çuar edhe në arrestimin e tetë personave të përfshirë në punime.
Sipas Policisë së Sarandës, kontrollet në terren janë intensifikuar ditët e fundit, me fokus të veçantë zonat bregdetare, aty ku gjatë sezonit veror shtohen edhe rastet e ndërtimeve pa leje. Pikërisht gjatë një prej këtyre verifikimeve u zbulua objekti në fjalë, ku po kryheshin punime të paligjshme në një hapësirë plazhi.
Në momentin e ndërhyrjes, uniformat blu arrestuan në flagrancë tetë shtetas, të cilët dyshohet se ishin të përfshirë dnë ndërtim. Të arrestuarit janë: K. R., 25 vjeç, E. S., 41 vjeç dhe O. C., 32 vjeç, banues në Sarandë; B. R., 48 vjeç, banues në Delvinë; E. R., 41 vjeç, banues në Lushnjë; O. B., 47 vjeç, banues në Tiranë; E. K., 42 vjeç, banues në Lezhë, si dhe Y. D., 33 vjeç, banues në Mat.
Ndërkohë, gjatë hetimeve është identifikuar edhe pronarja e hapësirës së plazhit, shtetasja A. B., për llogari të së cilës dyshohet se po kryheshin punimet. Ajo është shpallur në kërkim nga policia, ndërsa vijojnë përpjekjet për kapjen e saj.
Materialet procedurale do t’i referohen Prokurorisë, për veprime të mëtejshme.
Njoftimi i plotë i Policisë:
Sarandë/Goditet një rast i ndërtimit të paligjshëm, në plazh.
Arrestohen në flagrancë 8 shtetas.
Identifikohet dhe shpallet në kërkim shtetasja për llogari të së cilës dyshohet se po kryheshin punimet e paligjshme.
Si rezultat i kontrolleve dhe verifikimeve në terren, me prioritet zonat bregdetare, me qëllim parandalimin dhe goditjen e rasteve të ndërtimeve të paligjshme, shërbimet e Komisariatit të Policisë Sarandë konstatuan se në një objekt (i përbërë nga disa struktura, një pjesë e tyre, në ujë) në një hapësirë plazhi, në lagjen nr. 1, kryheshin punime ndërtimi, të paligjshme.
Gjatë ndërhyrjes, shërbimet e Policisë arrestuan në flagrancë shtetasit:
K. R., 25 vjeç, E. S., 41 vjeç dhe O. C., 32 vjeç, të tre banues në Sarandë;
B. R., 48 vjeç, banues në Delvinë;
E. R., 41 vjeç, banues në Lushnjë;
O. B., 47 vjeç, banues në Tiranë;
E. K., 42 vjeç, banues në Lezhë;
Y. D., 33 vjeç, banues në Mat.
Gjithashtu, u identifikua dhe u shpall në kërkim shtetasja që posedon hapësirën e plazhit, A. B.., për llogari të së cilës dyshohet se kryheshin punimet. Punohet për kapjen e kësaj shtetaseje.
Shërbimet e Policisë, pas kryerjes së veprimeve procedurale, kanë njoftuar shërbimet e IKMT-së, IMT-së dhe Policisë Bashkiake, të cilat aktualisht po vijojnë me prishjen e ndërtimeve.
Materialet procedurale do t’i referohen Prokurorisë, për veprime të mëtejshme.
