Një takim i rëndësishëm ndërmjet Kryeministrit grek, Kyriakos Mitsotakis, dhe Presidentit turk, Rexhep Tajip Erdogan, u anulua papritur për shkak të një kërkese të fundit nga pala turke.
Ky zhvillim ka ngjallur shqetësime dhe skepticizëm në Athinë, ku zyrtarët kishin punuar fort për organizimin e këtij angazhimi dypalësh.
Sipas burimeve diplomatike, vetëm katër orë përpara takimit të planifikuar, delegacioni turk informoi grekët që Erdogan do të merrte pjesë në një samit me liderët arabë dhe myslimanë, të organizuar nga Presidenti amerikan, Donald Trump, në të njëjtën kohë që ishte caktuar takimi greko-turk.
Ky incident vjen pas një serie koordinimesh dhe përpjekjesh për të përshtatur agjendat e liderëve gjatë Asamblesë së Përgjithshme të OKB-së.
Shenjat e parë për një mundësi të shtyrjes u vunë re që në mbrëmjen e së hënës, ndërsa diplomatët nga të dy vendet sugjeronin se anulimi mund të ishte i paevitueshëm.
Këshilltari turk, Akif Cagatay Kilic, e bëri kërkesën për shtyrjen e takimit te homologu i tij grek, Miltos Nikolaidis, por ky zhvillim u prit me shqetësim nga autoritetet greke.
Reagimet nga partitë opozitare në Greqi ishin të menjëhershme. Zëdhënësi i PASOK-ut për çështjet e jashtme, Dimitris Mantzos, theksoi se shtyrja dërgon “sinjale të gabuara” në një moment delikat të situatës gjeopolitike, ndërsa Rena Dourou nga SYRIZA argumentoi se ky veprim kontribuon në “margjinalizimin e Greqisë”.
