Bill Gates ka pranuar se takimet me Jeffrey Epstein kanë qenë një gabim, gjatë dëshmisë së tij me dyer të mbyllura në Kongresin amerikan.
“Nuk duhej ta kisha takuar kurrë Epstein”, deklaroi themeluesi i Microsoft, duke shtuar se me informacionin që ka sot e kupton se asnjë përfitim për Fondacionin Gates nuk do ta justifikonte lidhjen me financierin e ndjerë.
Gates theksoi se nuk ka qenë kurrë dëshmitar i sjelljeve kriminale të Epstein dhe se nuk kishte asnjë indicie që ai ishte i përfshirë në aktivitete të paligjshme.
“Unë nuk kam parë kurrë sjellje kriminale nga Epstein dhe nuk kam pasur asnjë arsye të dyshoja se ai ishte i përfshirë në veprimtari të paligjshme. Gjithashtu nuk kam qenë kurrë në ishullin e tij, në ranch-in e tij apo në vilën e tij në Florida”, u shpreh Gates.
Para se të paraqitej përpara Komisionit të Mbikëqyrjes së Dhomës së Përfaqësuesve, i cili po heton çështjen Epstein, miliarderi tha se kishte shkuar vullnetarisht për të bashkëpunuar me hetimin.
“Jam i lumtur që jam këtu për të dëshmuar vullnetarisht dhe për të ndihmuar punën e komisionit. Shpresoj që dëshmia ime të kontribuojë në gjetjen e drejtësisë për viktimat”, deklaroi ai.
Ligjvënësit amerikanë po përpiqen të kuptojnë më mirë natyrën e marrëdhënies mes Bill Gates dhe Jeffrey Epstein, një lidhje që ka ngritur pikëpyetje dhe ka ndikuar në imazhin jo vetëm të bashkëthemeluesit të Microsoft, por edhe të Fondacionit Gates.
Sipas New York Times, Gates ka angazhuar Jake Greenberg, ish-këshilltarin kryesor hetimor të komisionit, për ta ndihmuar pas publikimit të dosjeve që lidhen me Epstein. Gazeta vëren se roli i mëparshëm i Greenberg nuk ishte bërë publik më herët dhe se vendimi i Gates për t’iu drejtuar atij, edhe pse jo i pazakontë, ka ngjallur habi te disa ekspertë të etikës qeveritare. Sipas tyre, kjo mund të krijojë perceptime të diskutueshme në një hetim me profil të lartë.
