Zjarrfikësit spanjollë po vazhdojnë betejën intensive kundër zjarreve të mëdha pyjore, me dhjetëra helikopterë dhe avionë zjarrfikës që kryejnë fluturime të pandërprera për të frenuar përhapjen e flakëve. Në terren janë angazhuar gjithashtu mijëra zjarrfikës, ushtarë dhe ekipe emergjence, ndërsa autoritetet po luftojnë me vatra të shumta të favorizuara nga temperaturat e larta, thatësira dhe erërat e forta.
Një nga vatrat më problematike mbetet zjarri në provincën e Ávilës, i cili konsiderohet më i madhi i regjistruar ndonjëherë në Spanjë. Megjithëse autoritetet kanë arritur të vënë nën kontroll disa fronte, situata mbetet e rrezikshme dhe rreziku i riaktivizimit të flakëve është i lartë.
Bashkimi Evropian ka aktivizuar Mekanizmin e Mbrojtjes Civile për të ndihmuar Spanjën, duke dërguar gjashtë avionë zjarrfikës nga Greqia, Italia dhe Turqia, si edhe 134 efektivë dhe 41 automjete nga Portugalia për të mbështetur operacionet në terren.
Meteorologët paralajmërojnë se një valë e re të nxehti pritet të godasë Gadishullin Iberik në ditët në vijim, duke rritur rrezikun e shpërthimit të vatrave të reja. Ekspertët theksojnë se ndryshimet klimatike po i bëjnë sezonet e zjarreve më të gjata dhe më shkatërruese në Evropën Jugore.
