Kryetari i Partisë Demokratike, Sali Berisha, deklaroi në foltoren e përjavshme para Kryeministrisë se protesta e 20 shkurtit ishte ditë triumfi.
Ai përshëndeti qytetarët që morën pjesë dhe tha se tmerruan regjimin.
Berisha theksoi se protesta e 20 shkurtit e ka tmerruar “klikën e Edi Ramës”, që sipas tij meriton shekuj me burg e dënime.
“Nuk ka vendim më fisnik, nuk ka ideal më të lartë se sa beteja kundër këtij regjimi, kundër kësaj të keqe që ka ngërthyer trupin e Shqipërisë. Dhe një përshëndetje të veçantë për ata dhjetëra mijëra protestues që shndërruan 20 shkurtin e vitit 2026 në kryengritjen paqësore më të fuqishme që ka njohur Shqipëria pas 20 shkurtit të vitit 1991. 20 shkurti 2026 ishte dita e triumfit tuaj. Ishte dita e triumfit të idealeve demokratike. Dita e triumfit të guximit qytetar. Dita e triumfit të përgjegjësisë të qytetarëve shqiptarë ndaj vendit të tyre, ndaj kombit të tyre. Ishte dita në të cilën Tirana e tërë ishte në duart e qytetarëve. Dita që tmerroi këtë klikë, këtë organizatë kriminale të kryesuar nga Edi Rama, e cila në krimet e saj që ka kryer meriton shekuj, shekuj, shekuj burg dhe dënime”, deklaroi Berisha.
