Bashkimi Evropian dhe NATO kanë paralajmëruar se do të shtojnë presionin ndaj Rusisë, pas incidentit me dron në aeroportin e Leipzigut në Gjermani.
Presidentja e Komisionit Evropian, Ursula von der Leyen, tha se ngjarja përbën një “përshkallëzim të ri” në territorin e Bashkimit Evropian dhe akuzoi Rusinë për veprime gjithnjë e më të pamatura ndaj vendeve evropiane.
“Duhet të jemi të gatshëm t’i përgjigjemi pamaturisë së Rusisë më shpejt dhe më mirë”, deklaroi von der Leyen.
Edhe Sekretari i Përgjithshëm i NATO-s, Mark Rutte, shprehu mbështetjen e plotë për Gjermaninë, duke theksuar se të gjitha vendet anëtare të aleancës qëndrojnë në solidaritet me Berlinin.
Gjermania ka akuzuar Rusinë për një sulm të dështuar me dron në aeroportin Leipzig/Halle më 4 gusht. Sipas autoriteteve gjermane, droni kishte eksplozivë dhe ishte i ngjashëm me pajisje të përdorura në operacione të tjera hibride ruse.
Rusia i ka mohuar akuzat dhe ka deklaruar se Gjermania nuk ka paraqitur prova të mjaftueshme. Moska ka paralajmëruar gjithashtu se do t’u përgjigjet masave të marra nga Berlini.
Si pjesë e reagimit, Gjermania ka njoftuar mbylljen e konsullatës ruse në Bon dhe të “Shtëpisë Ruse” në Berlin.
