La Liga njoftoi papritur se ndeshja mes Barcelonës dhe Villarrealit nuk do të zhvillohet në Miami, por në Estadio El Madrigal. Menjëherë pas këtij vendimi, klubi katalanas publikoi një deklaratë zyrtare në rrjetet sociale, ku theksoi se e pranon vendimin, por shprehu zhgënjimin për humbjen e një mundësie të rëndësishme për rritjen ndërkombëtare të ligës.
“FC Barcelona respekton dhe pranon vendimin për anulimin e ndeshjes kundër Villarrealit në Miami, e vlefshme për javën e 17-të të La Liga-s, ashtu siç klubi kishte respektuar dhe pranuar më herët vendimin për ta luajtur takimin në Shtetet e Bashkuara,” thuhet në njoftim. “FC Barcelona shpreh keqardhje për humbjen e mundësisë për të rritur profilin e garës në një treg strategjik me potencial të madh zhvillimi dhe të ardhurash për të gjitha palët. Klubi falënderon tifozët tanë në SHBA për mbështetjen e palëkundur dhe u shpreh keqardhje që u mohohet mundësia të shohin një ndeshje zyrtare në vendin e tyre.”
Kujtojmë se kapiteni i Real Madridit, Dani Carvajal, kishte kritikuar më herët presidentin e La Liga-s, Javier Tebas, lidhur me idenë e zhvendosjes së ndeshjes së Barcelonës në Shtetet e Bashkuara, duke ndezur më tej debatin mbi ndeshjet jashtë Spanjës.
