Banka e Shqipërisë ka sinjalizuar se ekonomia shqiptare vijon rritjen, me një sistem financiar të konsoliduar dhe kushte të favorshme për kreditim. Në të tilla kushte, normat e interesit mbeten të pandryshuara, ndërsa institucioni konfirmoi pritshmëritë për stabilitet çmimesh.
“Në këndvështrimin makro-ekonomik, rritja ekonomike është mbështetur nga bilancet e shëndosha të sektorit privat, zgjerimi i të ardhurave nga turizmi, si dhe nga kushtet e favorshme të financimit”, u shpreh Sejko.
Guvernatori theksoi se rritja ekonomike mbështetet nga konsumi familjar, sektori i turizmit dhe një politikë fiskale e konsoliduar. Megjithatë, rreziqet nuk mungojnë.
“Ndonëse në zbutje, presionet tregtare dhe gjeopolitike përbëjnë rreziqe materiale të kahut të poshtëm. Nga ana tjetër, mungesat në tregun e punës dhe rritja e pagave mund të pasqyrojë në një nivel më të lartë inflacionin se sa parashikimet tona”, u shpreh Sejko.
Sejko bëri të ditur vendimin e Këshillit Mbikëqyrës të Bankës së Shqipërisë për të mbajtur të pandryshuar normën bazë të interesit, në nivelin 2.5%.
