Kreu i Partisë Demokratike, Sali Berisha, ka akuzuar kryeministrin Edi Rama se ka kërcënuar prokurorin që po heton dosjen e zëvendëskryeministres Belinda Balluku. Në mbledhjen e Grupit Parlamentar, Berisha tha se Rama i ka kërkuar llogari prokurorit për guximin e tij për të marrë në pyetje Ballukun, duke përdorur shprehjen: “Cili je ti që guxon të prekësh pasaportën e zëvendëskryeministres?”
Sipas Berishës, prokurori që firmosi thirrjen e Ballukut është përballur me “kërcënime vrasësish” dhe presione të drejtpërdrejta nga kreu i qeverisë, përmes ministrit të Drejtësisë, Ulsi Manja. Ai shtoi se Rama më pas “e qepi gojën”, pasi edhe vetë duhet të ishte personi që do t’i hiqej pasaporta.
Berisha: Kjo mbledhje e grupit parlamentar thirret në një moment kritik për vendin, në një moment kritik për opozitën dhe opozitarizmin.
Ju jeni dëshmitarë se ngrehina e narkoshtetit, e qelbur nga koka, kundërmon sot më shumë se kurrë në Shqipëri dhe në botë.
Zëvendësja më besnike e Edi Ramës në 25 vitet e fundit, Lubi Balluku, merret e pandehur për një të mijëtën e vjedhjeve dhe shpërdorimeve të saj.
Një të mijëtën!
Dhe marrja e saj e pandehur ishte një akt kaluari i vërtetë, do të themi atë që është, për atë prokuror që guxoi të firmosë thirrjen e saj.
Ai prokuror që guxoi të firmosë thirrjen e një personi që bashkë me Edi Ramën kanë zhdukur miliarda në tendera në këtë vend, ai u përball me kërcënime vrasësish, me kërcënime indirekt të bosit të tij, Troplinit në krye të Skapit, por edhe me kërcënime direkt të kryeministrit nëpërmjet telefonit të faqezi Manjës, Ulsi Manjës.
Shikoni se ku jemi.
Cili je ti, i thotë Ramaduro prokurorit, që guxon të prekësh pasaportën e zëvendëskryeministres së Shqipërisë?
Kjo është e vërteta.
Dhe kur merr ca mesazhe Ramaduro, e qep gojën sepse ishte vetë personazh që duhej t’i hiqej pasaporta.
Por, pavarësisht nga kjo situatë, ai zgjedh të mbrojë me kusht veprimtarinë e tij kriminale.
Përdor të gjitha mjetet e propagandës kundër opozitës, dhe jo vetëm propagandës, dhe mbrojtjen e krimeve të tij.
