Kryetari i Grupit Parlamentar të Partisë Socialiste, Taulant Balla, zhvilloi një takim me delegacionin e Komisionit të Venecias të Këshillit të Evropës, në kuadër të hartimit të opinionit për projektligjin “Për financimin e partive politike”.
Pas takimit, Balla theksoi se mazhoranca mbetet e angazhuar për një proces gjithëpërfshirës në reformën zgjedhore, duke nënvizuar rëndësinë që legjislacioni shqiptar të jetë në përputhje me praktikat më të mira evropiane dhe standardet demokratike ndërkombëtare.
Sipas tij, bashkëpunimi me Komisionin e Venecias ka një rol të veçantë në forcimin e institucioneve demokratike në Shqipëri dhe në përparimin e vendit drejt integrimit evropian.
Balla shprehu gjithashtu mirënjohje për kontributin e vazhdueshëm të Komisionit të Venecias, veçanërisht në forcimin e shtetit të së drejtës, në reformën në drejtësi dhe në konsolidimin e institucioneve demokratike.
Ai theksoi se rekomandimet dhe ekspertiza e Komisionit të Venecias mbeten të rëndësishme për krijimin e një sistemi më transparent dhe më të drejtë për financimin e partive politike, si pjesë e përpjekjeve për të forcuar standardet demokratike në vend.
