Një fitore me karakter dhe “shije” Champions-i. Atalanta ka arritur të mposhtë Napolin e Antonio Contes me rezultatin 2-1, duke u ngjitur vetëm dy pikë larg vendit të katërt dhe duke e futur zyrtarisht veten në garë për një vend në elitën e Europës.
Pjesa e parë: Napoli në avantazh, VAR-i protagonist
Ndeshja nisi më mirë për miqtë. Në minutën e 18-të, Beukema kërceu më lart se të tjerët pas një goditje dënimi të Gutierrez, duke dërguar topin në rrjetë për 0-1. Napoli mendoi se e dyfishoi avantazhin pak më vonë me Alisson, por goli u anulua për pozicion jashtë loje.
Momenti më i diskutueshëm i pjesës së parë erdhi në minutën e 44-t, kur gjyqtari Chiffi akordoi një penallti për Napolin pas një ndërhyrjeje të Hien ndaj Hojlund. Megjithatë, pasi rishikoi pamjet në VAR, arbitri ndryshoi vendimin duke revokuar penalltinë dhe duke i dhënë karton të verdhë sulmuesit për simulim.
Përmbysja e madhe në pjesën e dytë
Në pjesën e dytë, lëvizjet e trajnerit Palladino rezultuan vendimtare. Atalanta rriti presionin dhe në minutën e 61-të gjeti barazimin: Pasalic shfrytëzoi perfekt një krosim nga këndi të Zalewski-t, duke shënuar me kokë për 1-1.
Kur ndeshja dukej se po shkonte drejt barazimit, në minutën e 81-të skena u vodh nga dy lojtarë të ardhur nga stoli. Bernasconi hodhi një krosim milimetrik në zonë, ku Lazar Samardzic u shkëput bukur dhe me një goditje me kokë mposhti Milinkovic-Savic, duke vulosur shifrat në 2-1.
Mbrojtja e çeliktë dhe kontributi i Gjimshitit
Në minutat e fundit, Conte provoi gjithçka duke hedhur në fushë edhe Lukakun, por mbrojtja e Atalantës, e përforcuar edhe me hyrjen e kapitenit të kombëtares sonë, Berat Gjimshiti (i cili zëvendësoi Scalvinin), rezistoi deri në fund duke mos lënë hapësira.
Me këtë fitore, Atalanta konfirmon formën e shkëlqyer dhe i dërgon një mesazh të qartë rivalëve: Lufta për vendin e katërt do të jetë e luftuar deri në sekondën e fundit!
