Mikel Arteta ka folur me shumë besim para finales së Champions League ndaj Paris Saint-Germain, duke theksuar se Arsenal nuk ka ardhur në Budapest thjesht për të marrë pjesë, por për të fituar trofeun.
Sipas BBC, trajneri i londinezëve deklaroi se skuadra e tij e ka merituar vendin në finale falë paraqitjeve gjatë gjithë kompeticionit dhe tashmë duhet të bëjë hapin e fundit.
“PSG është kampione në fuqi dhe ne jemi këtu për t’ua marrë trofeun”, u shpreh Arteta, duke treguar qartë ambicien e Arsenal për të shkruar histori.
Trajneri spanjoll e cilësoi këtë finale si një mundësi të madhe për klubin, pasi Arsenal luan vetëm finalen e dytë të Champions League në historinë e tij. Sipas tij, skuadra duhet të hyjë në fushë me qartësi, guxim dhe dëshirë të pandalshme për fitore.
Arteta konfirmoi gjithashtu se Jurrien Timber dhe Noni Madueke janë gati për finalen, ndërsa Ben White do të mungojë. Ai vlerësoi edhe Luis Enrique, duke e cilësuar si një trajner frymëzues dhe me ndikim të madh te PSG.
Arsenal kërkon të mbyllë sezonin me një tjetër trofe, pas suksesit në Premier League. “Kemi fituar një trofe, tani duam të dytin”, tha Arteta para finales së madhe.
