Emërimi i Ismael Elfath si arbitër i gjysmëfinales së Kupës së Botës mes Anglisë dhe Argjentinës ka ndezur menjëherë polemika në mediat angleze.
Arbitri amerikan me origjinë marokene do të drejtojë një nga ndeshjet më të mëdha të turneut, por në Angli ky vendim është pritur me shumë dyshime, sidomos për shkak të bilancit të Lionel Messit në ndeshjet ku Elfath ka qenë në fushë.
“Lionel Messi merr arbitrin e tij të preferuar për gjysmëfinalen e Kupës së Botës mes Anglisë dhe Argjentinës”, shkroi Daily Mail në rrjetet sociale, duke shkaktuar menjëherë reagime të shumta nga tifozët.
Sipas mediave angleze, Messi ka fituar të gjitha ndeshjet ku është arbitruar nga Elfath. Për më tepër, në Angli rikujtohen edhe disa episode të mëparshme në MLS, ku vendimet e arbitrit janë konsideruar të favorshme për yllin argjentinas.
Polemikat janë shtuar edhe për shkak të paraqitjes së Elfath në ndeshjen mes Spanjës dhe Uruguait, ku ai u kritikua për mënyrën se si menaxhoi lojën fizike të skuadrës amerikano-jugore. Sipas shtypit anglez, arbitri lejoi shumë ndërhyrje të forta dhe vonoi ndëshkimet, duke krijuar pakënaqësi te spanjollët.
Tani frika në Angli është se ndaj Argjentinës mund të përsëritet i njëjti skenar. “Tre Luanët” do të përballen me një kundërshtar shumë të fortë dhe me përvojë, ndërsa çdo vendim arbitral mund të ketë peshë të madhe në një ndeshje që vendos finalistin e Kupës së Botës.
Gjysmëfinalja Angli-Argjentinë vjen kështu me tension të shtuar, ende pa nisur topi i parë. Përveç duelit në fushë, sytë do të jenë edhe te Ismael Elfath, arbitri që tashmë është kthyer në temë debati para sfidës së madhe.
