Ambasadori i Bashkimit Evropian në Tiranë, Silvio Gonzato, së bashku me delegacionin e BE-së, zhvilloi një vizitë në ambientet e rikonstruktuara të Gjykatës së Posaçme kundër Korrupsionit dhe Krimit të Organizuar. Gjatë takimit me drejtuesin e komanduar të GJKKO-së, Erion Bani, u diskutua mbi rëndësinë e përmirësimit të infrastrukturës gjyqësore, si një ndër prioritetet kryesore për sistemin e drejtësisë. Po ashtu, në fokus ishte edhe roli i gjykatës në rritjen e besimit të publikut ndaj drejtësisë dhe ruajtjen e standardeve të larta në procesin e vendimmarrjes.
Në reagimin e shpërndarë në rrjetet sociale thuhet se godina e GJKKO-së është financuar nga Bashkimi Evropian dhe së fundmi është rikonstruktuar për të përmbushur standardet më të larta të BE-së. Sipas njoftimit, 80% e kostos së rikonstruksionit është mbuluar përmes ripërdorimit të aseteve të konfiskuara. “Vizituam godinën e Gjykatës së Posaçme kundër Korrupsionit dhe Krimit të Organizuar, e cila është financuar nga BE dhe së fundmi është rikonstruktuar për të përmbushur standardet më të larta të BE-së.
Ne mirëpresim faktin që 80% e kostos së rikonstruksionit u financua përmes ripërdorimit të aseteve të konfiskuara”, thuhet ndër të tjera në postim. Në të njëjtin reagim theksohet se ambasadori Gonzato ka nënvizuar nevojën që përmirësimi i infrastrukturës gjyqësore të mbetet prioritet në të gjithë vendin, me qëllim garantimin e sigurisë, transparencës dhe aksesit në drejtësi.
