Kryepeshkopi i Tiranës, Durrësit dhe i Gjithë Shqipërisë, Anastas Janullatos ka ndërruar jetë mëngjesin e të shtunës pas një beteje të gjatë shëndetësore.
Fortlumturia e Tij do të prehet në Shqipëri; ky ishte edhe amaneti i tij para se të mbyllte sytë përgjithmonë në moshën 95-vjeçare në një spital në Athinë. Janullatos do të prehet në katedralen ortodokse “Ringjallja e Krishtit” në Tiranë ku në nder të tij do të mbahet për dy ditë edhe ceremonia e homazheve po në këtë katedrale.
Trupi i Kryepeshkopit pritet të transportohet përmes rrugës tokësore drejt Shqipërisë të martën. Janullatos pësoi hemorragji gastrike, dhe pas disa ditësh trajtimi në një spital privat në Tiranë, gjendja e tij shëndetësore u përkeqësua, duke e detyruar atë të transportohej më 3 janar drejt Athinës me një avion të Forcave Ajrore. Pavarësisht përpjekjeve mjekësore dhe kujdesit intensiv që ai mori, gjendja e tij u përkeqësua përditë, për shkak të funksionimit të pamjaftueshëm të disa organeve.
Pesë ditë zie kishtare janë shpallur në mbledhjen e Sinodit nga data 25 – 29 janar 2025. Në ditën e parë të zisë kishtare për ndarjen nga jeta të Kryepeshkopit Anastas Janullatos, në katedralet “Ngjallja e Krishtit”, në Korçë, Gjirokastër dhe Durrës u mbajtën gjatë mëngjesit të djeshëm shërbesat e përshpirtjes. Dhjetëra besimtarë u lutën dhe ndezën qirinj për prehjen e shpirtit të Kryepeshkopit Janullatos.
Trupi i pajetë i kryepeshkopit do të mbërrijë në Shqipëri të martën. Pritja do të bëhet para katedrales “Ngjallja e Krishtit” Tiranë, në orën 16:00 të pasdites. Pas pritjes, do të mbahen homazhe brenda Katedrales gjatë pasdites të së martës si dhe ditën e mërkurë, në datë 29 janar. Ceremonia e varrimit do të bëhet të enjten e 30 janarit, ku Kryepeshkopit Anastas do t’i jepet lamtumira e fundit pas liturgjisë hyjnore në katedralen “Ngjallja e Krishtit”, në orën 11:00.
Në ceremoninë e përcjelljes për në banesën e fundit pritet të marrin pjesë përfaqësues të lartë dhe patriarkë nga kishat ortodokse në botë. Kryepeshkopi Anastas, ishte rindërtuesi dhe rigjallëruesi i Kishës Orthodhokse Autoqefale të Shqipërisë, të cilën e ngriti nga rrënojat pas rënies së regjimit ateist.
