Ish-Presidenti i Republikës së Shqipërisë, Alfred Moisiu, feston sot 95-vjetorin e lindjes, një ngjarje e veçantë që ka sjellë urime nga figura të rëndësishme të vendit.
Presidenti i Republikës, Bajram Begaj, e ka uruar Moisiun përmes një letre të hapur, duke vlerësuar kontributin e tij të çmuar për Shqipërinë.
“I dashur President Moisiu,
Kam kënaqësinë e veçantë që, me rastin e ngjarjes së gëzueshme të 95-vjetorit të datëlindjes Suaj, të bashkohem me familjarët, miqtë dhe dashamirësit Tuaj për t’ju transmetuar urimet e mia më të përzemërta për shëndet të plotë, jetë të gjatë dhe aktive,” shkruan Begaj.
Presidenti Begaj theksoi angazhimin e Moisiut që në adoleshencë si pjesë e Ushtrisë Nacional-Çlirimtare, si dhe rolin e tij të rëndësishëm në histori, duke kulmuar me postin e Presidentit të Republikës.
“Ju kontribuuat me përgjegjësi gjatë ushtrimit të detyrës së Kreut të Shtetit, veçanërisht në kohë të vështira, me urtësi dhe frymë përbashkuese, duke ndihmuar në konsolidimin e demokracisë dhe forcimin e imazhit ndërkombëtar të Shqipërisë,” shton ai.
