Një ushtrim i gjerë antiterrorizmi dhe mbrojtjeje civile është zhvilluar në Terminalin 5 të Aeroportit të Fiumicino, nën koordinimin e Prefekturës së Romës dhe autoriteteve vendore.
Aktiviteti është pjesë e përgatitjeve të vazhdueshme për garantimin e sigurisë së fluturimeve dhe forcimin e kapaciteteve të reagimit në situata emergjente.
Në ushtrim u angazhuan një sërë institucionesh, përfshirë Autoritetin Italian të Aviacionit Civil (ENAC), Agjencinë e Navigacionit Ajror (ENAV), Policinë e Romës, Karabinierët, Guardia di Finanza, zjarrfikësit dhe Kryqin e Kuq Italian.
Sipas ‘La Repubblica’, skenari i trajnimit u zhvillua në zonën e Terminalit 5, e cila aktualisht nuk përdoret për trafikun e pasagjerëve, për të shmangur çdo ndikim në operacionet e aeroportit.
Ushtrimi u fokusua në testimin e Planit Kombëtar të Sigurisë, që synon të verifikojë gatishmërinë e autoriteteve ndaj kërcënimeve terroriste dhe emergjencave të tjera.
Aktiviteti zgjati gjatë gjithë ditës, duke u siguruar që fluturimet, pasagjerët dhe operatorët të mos preken. Ushtrime të tilla janë thelbësore për të identifikuar dobësitë në sistemet e sigurisë dhe për të garantuar një reagim të koordinuar dhe efektiv në rast të një incidenti real.
