Gjykata e Posaçme Kundër Korrupsionit dhe Krimit të Organizuar ka konfirmuar masën e sigurisë “arrest në burg” për katër të pandehurit, vëllezërit Kristi, Fation dhe Aleksandër Bushgjokaj, si dhe Petrit Hoxha alias Çakri, të cilët akuzohen se kanë rrëmbyer dhe vrarë të riun Renis Dobra në zonën e Matit.
Në seancën gjyqësore, të pandehurit kanë kërkuar ndjesë për incidentin e ndodhur në seancën e mëparshme, ku ata u përfshinë në një përplasje fizike me njëri-tjetrin brenda sallës së gjyqit.
Mbrëmjen e 8 korrikut, 23-vjeçari Renis Dobra u mor peng nga autorët e dyshuar dhe më pas u mbyt me litar.
Trupi i tij u gjet buzë liqenit të Shkopetit, ndërsa makina ishte në ujë. Fillimisht policia dyshoi se i riu ishte mbytur, por në bazë të hetimeve dhe në këqyrjen e kamerave të sigurisë u zbuluan lëvizjet e makinës së personave të arrestuar dhe atyre në kërkim në zonën ku ndodhi krimi.
