Ka ndërruar jetë në Spitalin e Traumës në Tiranë 19-vjeçari Indrit Shyti, i cili u përfshi në një aksident të rëndë automobilistik ditën e djeshme në bypass-in Mbrostan-Levan, pranë Spitalit Memorial të Fierit.
Sipas informacioneve paraprake, Shyti ishte drejtuesi i automjetit tip “Volkswagen”, me të cilin humbi kontrollin dhe përfundoi në kanal. Si pasojë e aksidentit mbetën të plagosur drejtuesi dhe dy pasagjerët që ndodheshin në automjet.
19-vjeçari u transportua fillimisht në Urgjencën e Spitalit Rajonal të Fierit, por për shkak të gjendjes së rëndë shëndetësore u dërgua për trajtim të specializuar në Spitalin e Traumës në Tiranë.
Pavarësisht ndërhyrjes së mjekëve, Shyti nuk ka mundur t’u mbijetojë plagëve të marra dhe ka ndërruar jetë.
Ndërkohë, vijojnë hetimet për të zbardhur rrethanat dhe shkaqet e aksidentit të rëndë.
