Partia Demokratike e Kosovës (PDK) ka shprehur reagimin e saj pas propozimit të Glauk Konjufcës për mandatar të Qeverisë nga ana e Lëvizjes Vetëvendosje. PDK-ja, përmes një komunikate të lëshuar për mediat, thekson se si dështoi Albin Kurti në sigurimin e shumicës, po ashtu do të dështojë çdo një përpjekje tjetër për ta vazhduar këtë proces “artificial” nga Lëvizja Vetëvendosje.
Sipas PDK-së, situata politike është e qartë: askush nuk ka shumicën e nevojshme për të formuar një qeveri nga legjislatura aktuale. Ata konstatojnë se vendi është në një moment të rëndësishëm politik dhe institucional, që kërkon vendime të qarta dhe përgjegjëse, duke pasur parasysh se shumica shqiptare në Kuvend, së bashku me disa deputetë të komuniteteve joshumicë, janë të bindur se nuk do të votonin për një mandatar të ri nga Lëvizja Vetëvendosje. PDK-ja paralajmëron se çdo përpjekje për t’i dhënë sërish mandatin kësaj partie do të ishte një humbje kohe dhe do të thellonte mungesën e besimit në institucione.
PDK-ja shprehet se injorimi i këtij realiteti do ta thellonte krizën dhe do ta dëmtonte stabilitetin e vendit. Në emër të këtyre përgjegjësive, ata kërkojnë një fund për çdo skemë zvarritëse dhe kërkojnë zgjedhje të reja të parakohshme, për t’i dhënë popullit të Kosovës mundësinë për të vendosur për të ardhmen e vendit.
PDK-ja thekson se kriza e shkaktuar gjatë vitit nga Lëvizja Vetëvendosje ka pasur pasoja të rënda, përfshirë dëme në ekonomi dhe keqësim të mirëqenies së qytetarëve. Ata paralajmërojnë gjithashtu për rrezikun që buxheti i shtetit të mos kalojë, duke bërë që qytetarët mund të mbeten pa paga vitin e ardhshëm. Kjo situatë e bën akoma më të domosdoshme një shpejtim drejt procesit të zgjedhjeve të reja, për të rikthyer legitimitetin e institucioneve në Kosovë.
