NASA, në bashkëpunim me kompaninë amerikane Lockheed Martin, ka zhvilluar me një investim prej 518 milionë dollarësh avionin eksperimental X-59, i cili synon të sjellë një revolucion në udhëtimet ajrore, fluturime supersonike pa zhurmën shpërthyese të shpejtësisë së zërit.
Avioni, i njohur si “Quiet Supersonic Jet”, është projektuar për të demonstruar se fluturimet me shpejtësi mbi atë të zërit mund të realizohen pa krijuar valën tronditëse të zhurmës që dikur i ndalonte këto fluturime në zonat e banuara.
Testi i parë u zhvillua në Palmdale, rreth 100 kilometra në veri të Los Anxhelosit, ku X-59 u ngrit me sukses dhe pas rreth një ore fluturimi, u ul në bazën ajrore Edwards. Gjatë testit, avioni arriti një shpejtësi prej 379 km/h dhe një lartësi fluturimi prej 3,660 metrash, duke fluturuar nën shpejtësinë e zërit.
Me një gjatësi prej 30 metrash dhe një motor të vetëm, X-59 përfaqëson hapin e parë drejt rikthimit të fluturimeve supersonike komerciale, por këtë herë, pa “boom”-in e famshëm sonik.
NASA planifikon të vazhdojë testimet në vitet e ardhshme, përpara se ta prezantojë teknologjinë tek kompanitë e fluturimeve komerciale, me synimin për të hapur epokën e re të “fluturimeve të shpejta dhe të qeta”.
