Chelsea rikthehet fuqishëm në top katërshe, Pedro i jep fitoren ndaj Tottenhamit
Chelsea u rikthye në zonën e katër ekipeve të para të Premier League, pas një fitoreje të merituar 1-0 ndaj Tottenhamit në derbin londinez të së shtunës. Pavarësisht rezultatit minimal, “Blutë” ishin dukshëm më superiorë në fushë, duke dominuar lojën dhe duke kufizuar rivalët në vetëm tre goditje, prej të cilave vetëm një në kuadrat.
Ndeshja nisi me ritëm të ngadaltë për shkak të disa ndërprerjeve për dëmtime, por Chelsea krijoi rastin e parë të qartë me Joao Pedron, i cili u ndal nga portieri Guglielmo Vicario pas një përballjeje një kundër një. Vetëm pak minuta më vonë, gabimi i Micky van de Ven në mbrojtje u shfrytëzua në mënyrë perfekte nga Moises Caicedo, që ia dha topin Pedro-s për golin e avantazhit.
Në pjesën e dytë, Chelsea menaxhoi me qetësi rezultatin dhe pati mundësi për ta mbyllur takimin me një rezultat më të thellë, por Gittens dhe Pedro u ndalën sërish nga Vicario. Nga ana tjetër, Tottenham nuk arriti të krijonte asnjë rrezik serioz ndaj portës kundërshtare.
Fitorja vulosi një tjetër paraqitje të fortë për skuadrën e Enzo Marescës, e cila po shfaq stabilitet dhe efikasitet si në fazën mbrojtëse, ashtu edhe në organizimin e lojës. Me këtë sukses, Chelsea forcon pozitat në garën për zonën Champions dhe tregon se është rikthyer si një forcë serioze në Premier League.
