Kryeministri Edi Rama mori pjesë në Forumin e Paqes në Paris, nismë e presidentit Emmanuel Macron që këtë vit mblodhi personalitete ndërkombëtare me fokus fuqizimin e bashkëpunimit mes shteteve. Gjatë fjalës së tij, Rama theksoi pozicionin e veçantë të Shqipërisë brenda komunitetit ndërkombëtar dhe ngriti shqetësime për drejtimin e politikave europiane ndaj konfliktit dhe paqes.
Rama tha se Shqipëria është një nga shtetet që në dekada nuk ka pasur udhëheqës rus që të vizitojnë vendin dhe se zyrtarët shqiptarë nuk kanë kryer vizita zyrtare drejt Rusisë.
“Dhe përfaqësoj të vetmin vend në këtë komunitet ku asnjë udhëheqës rus nuk ka ardhur qysh prej viteve 1960 dhe nga prej ku asnjë nga udhëheqësit nuk ka udhëtuar drejt Rusisë. Ky është niveli i marrëdhënieve i patën gjatë komunizmit i patën në formën më të keqe sepse vazhduam të qëndronim Stalinist, nuk na merr malli për ta, kurrë në këto 35 vite nuk kemi pasur jo vetëm vizita të nivelit rus. Ky jam unë dhe këtë përfaqësoj”, tha Rama, teksa më tej vijoi duke bërë një vlerësim të reagimit ndërkombëtar ndaj luftës.
Kryeministri shqiptar tha se dialogu dhe komunikimi kanë munguar dhe se përpjekjet për armëpushim u trajtuan me vonesë. Në këtë kontekst, ai kërkoi që Evropa të synojë më shumë autonomi politike dhe një plan paqeje të qartë, jo si dorëzim ndaj kërkesave të palës tjetër por si strategji për t’u përgatitur për një proces paqësor të qëndrueshëm.
Ndër të tjera kreu i qeverisë theksoi se qëndrimi i Shqipërisë reflekton realitetin e një shteti të vogël që megjithatë ndjen përgjegjësi për të ngritur zërin dhe për të kontribuar në debatet strategjike.
