Reagimi i Vinicius Junior pas zëvendësimit në “El Clásico” vazhdon të jetë në qendër të vëmendjes. Braziliani, i zemëruar që u hoq nga loja, u pa duke thënë: “Po largohem nga kjo skuadër.”
Ndër ata që reaguan ishte edhe ish-shoku i tij te Real Madridi, Toni Kroos, i cili në një intervistë në Gjermani e mbrojti sulmuesin, duke treguar mirëkuptim për reagimin e tij emocional.
“Kur luan një ndeshje të madhe dhe ke një paraqitje të shkëlqyer, është normale të mos jesh i lumtur kur të zëvendësojnë. Edhe mua nuk më ka pëlqyer kurrë të dal nga fusha. Por unë kurrë nuk kam hyrë në dhomën e zhveshjes menjëherë pas zëvendësimit. Njerëzit gjykojnë lehtë nga jashtë, pa kuptuar emocionin që ndjen një lojtar në një ndeshje si ‘El Clásico’, përpara 80 mijë tifozëve dhe me rezultatin 2–1,” – u shpreh Kroos.
Gjermani shtoi se konflikti nuk do të thellohet mes Vinicius-it dhe trajnerit Xabi Alonso, pasi ky i fundit e kupton plotësisht situatën:
“Ai mund ta kishte përmbajtur më shumë zemërimin e tij. E kuptoj plotësisht, por mënyra si u shpreh nuk ishte ideale. Megjithatë, është një situatë emocionale e jashtëzakonshme. Unë kam qenë në ato momente dhe e di sa e vështirë është. Trajnerët që kanë qenë vetë lojtarë nuk e marrin shumë seriozisht një reagim të tillë.”
Në fund, Kroos u shpreh i kënaqur me fitoren e Real Madridit ndaj Barcelonës:
“Jam shumë i lumtur që Reali fitoi. Një fitore e merituar – e menaxhuan me inteligjencë dhe e shfrytëzuan dobësinë e Barcelonës.”
