Një 49-vjeçar, i dënuar me 29 vite burg në Napoli për për pjesëmarrje në një organizatë kriminale për trafikim të lëndëve narkotike është arrestuar nga policia e Beratit.
Në pranga ka rënë edhe një 53-vjeçar që strehonte në Kuçovë, shtetasin e shpallur në kërkim ndërkombëtar.
Sipas policisë, në kuadër të operacionit “Rrjeta” u arrestua shtetasi i shpallur në kërkim ndërkombëtar, Armando Pjetri, 49 vjeç dhe shtetasi A. H., 53 vjeç, banues në Kuçovë, për veprat penale “Përkrahja e autorit të krimit”, dhe “Prodhimi dhe shitja e narkotikëve”.
Gjykata e Apelit në Napoli e ka dënuar 49-vjeçarin, që strehohej nga 53-vjeçari, me 29 vjet burgim, për veprën penale “Trafikimi i lëndëve narkotike”, kryer në kuadër të organizatës kriminale.
Në banesën ku strehohej shtetasi i kërkuar ndërkombëtarisht, në lagjen “1 Maji”, u gjet një sasi lënde narkotike Cannabis Sativa që u sekuestrua me cilësinë e provës materiale.
Interpol Tirana vijon bashkëpunimin me Interpol Romën, për të finalizuar procedurën për ekstradimin e shtetasit Armando Pjetri, në Itali. Ndërkaq, materialet procedurale iu referuan Prokurorisë së Beratit, për veprime të mëtejshme.
