Greqia ka hyrë në një fazë të re teknologjike të mbrojtjes, me prodhim të dronëve në bazën e 306-të të Telekomunikacionit në Aharnes. Aty, inxhinierët e Forcave të Armatosura krijojnë mbi 1.000 dronë në vit, përfshirë modele të vogla FPV (First-Person View) dhe njësi më të mëdha për zbulim dhe mbështetje taktike. Një risi është se këta dronë tani mund të prodhohen edhe në stacione portative pranë vijës së frontit, një zhvillim që do të demonstrohet për herë të parë në paradën e 28 tetorit në Selanik.
Ministri i Mbrojtjes, Nikos Dendias, ka theksuar rëndësinë e këtyre dronëve si një simbol të ushtrisë greke që po i afrohet epokës së inteligjencës artificiale. Këto zhvillime e pozicionojnë Greqinë në krye të prodhimit evropian të mjeteve pa pilot, në një kohë kur siguria kontinentale po rimendohet.
Në një kontekst më të gjerë, kreu i qeverisë greke, Kyriakos Mitsotakis, në një samit në Bruksel, ka bërë thirrje për krijimin e një mekanizmi të përbashkët huamarrjeje nga Bashkimi Evropian për të financuar investime të përbashkëta në mbrojtje, si dronët dhe sistemet antiajrore. Ai nënvizoi se është e nevojshme që mbrojtja të trajtohet si një “e mirë publike evropiane”, e cila do të përfitojë për të financuar projekte që disa vende anëtare mund të mos kenë kapacitetin t’i realizojnë vetë.
Mitsotakis gjithashtu shprehu kënaqësinë për rritjen e mbështetjes për iniciativat greke, si mburoja e përbashkët antiraketë për BE-në, të cilat duket se po fitojnë vrull dhe jane përfshirë në planin e Komisionit Evropian. Ky zhvillim reflekton një përpjekje të Greqisë për të forcuar pozitat e saj në infrastrukturën e mbrojtjes në një kohë kur tensionet globale janë në rritje.
