Një video e regjistruar nga një kamera në makinë ka kapur momentin tronditës kur erërat e fuqishme rrëzuan një grua në mes të rrugës në Zelandën e Re.
VIDEO KETU
Në pamje duken pemët dhe semaforët që lëkunden fort nga stuhia, ndërsa gruaja përpiqet të mbahet diku për të qëndruar në këmbë. Përpjekja e saj, megjithatë, nuk mjafton, pasi era e ngre në ajër dhe e hedh në mes të rrugës.
Fatmirësisht, drejtuesit e dy automjeteve që po kalonin aty pranë reaguan me shpejtësi, duke frenuar në kohë dhe shmangur një tragjedi.
Shërbimi Meteorologjik i Zelandës së Re ka lëshuar një paralajmërim të kuq për disa zona të vendit, duke njoftuar për erëra me shpejtësi deri në 140 km/h dhe duke paralajmëruar për “rrezik serioz për jetën” për shkak të objekteve që mund të fluturojnë dhe pemëve të rrëzuara.
Në pjesën perëndimore të vendit janë regjistruar 100 deri në 180 milimetra shi gjatë 24 orëve të fundit, ndërsa autoritetet kanë paralajmëruar për një stuhi edhe më të fuqishme që pritet të mbërrijë sot, të enjten.
